ما سبب استكبار وتجبر وطغيان أصحاب السيارات الكبيرة والجيوب الكبيرة

32 30

لايمكنك التصويت حتى الحصول على 20 نقطة على الأقل
إضغط هنا للإخفاء

وليد م ع الدخيِّل 490
قبل 9 سنه و 10 شهر

بسم الله الرحمن الرحيم

الطريق شبه فاظي، قليلة جداً السيارات اللي كانت بالأيسر وفتحت لي علشان أسقط عليها.

كنت مولع النور بما أن الشمس غابت تقريباً، والطريق قدامي فاظي الأيمن والأوسط، الأيسر فقط فيه لاندكروز 2010 أعتقد أبيض.

عطيته كبسة سريعة جداً بس واضحة، يعني شفني تراي جاي.

انتظرته يفتح انتظرت انتظرت.

أبو الشباب وش سالفته.

عطيته كبسة ثانية طويلة، قام يفتح شوي شوي شوي شوي!!!

أنا قفلت معي !!!

ووصلته المشكلة ما بقي إلا 20 متر تقريباً.

وأصكه كبسة وأسقط عليه وأشطفه أخليه يروح للأوسط مثل الناس.
اللي ما يعرف يسوق نعلمه.
واللي جاي يفرض علينا قوانينه وشخصيته يروح يفرضها في مجالسه مو في الشوارع.

الشوارع فيها أنظمة وأخلاقيات.

جت سيارة بتسقط، افتح على طول بسرعة لا تخليه يضطر يكبس لك.

لكن البعض هنا ما يفتح وهو عارف إنك وراه، وينتظرك لين تعطيه كبسة ثم يقعد يفتح بالملي !!!


إلى متى بنستمر نحتمل هالناس وهالعقليات !!؟؟



المهم شطفته ومشيت ووصلت تفتيش ام سدرة توقعت إنه بلغ عني وبيوقفوني، بس الحمد لله ما فيه عساكر أصلاً.

بعد التفتيش مشيت الهون 120، ما دريت إلا ويجي ويصلق فيني من ورا، وأشوفه يسجل لوحتي هههههههههه




موقف مشابه لهالموقف في نفس الطريق ونفس المكان ونفس الموتر أيضاً !!!

قبل أربع شهور، أمشي بالأيسر ومسرع شوي، وفيه لاندكروز بالأوسط، وفيه تريله في السيد الأيمن بيسقط عليها.

أبو الشباب يوم وصل التريلة ويترك الأوسط ويطلع على الأيسر !!!!

وأنا وصلته يا ولد وش أسوي ؟!؟!

يابن الناس ما كفاك السيد الأوسط كله عرض أكثر من 3 أمتار ما كفاك تمشي فيه؟!؟! وش خايف من التريلة تعظك ؟!؟!؟!

ألاحظ كثير ناس صاروا يسوون هالحركة الغريبة المزعجة واللي ممكن تسبب حوادث !!

وأعطيه كبسة طويلة وأطلع على الأصفر.

يوم تعديته ويكبس العالي علي !!! هالحين أنت الغلطان علي وتعاقبني أنا ؟!؟! من اللي المفروض يعاقب الثاني ؟!؟!

واترك البنزين واهدي سرعتي لين وصلني وهو يمشي بين الأوسط والأيسر، ورجع للأوسط أخيراً ونزل العالي.

قلت الحمد لله وأمشي وأتركه.

وأوصل تفتيش أم سدرة ويوقفوني يقولون عليك بلاغ !!!
وأقعد أسولف مع العسكري ننتظر ذا اللي مبلغ عني مدة حوالي 20 دقيقة، وبالأخير جاهم اتصال منه يقول: (خلاص ما أبي منه شي وأنا تعديت التفتيش) !!!

مبلغ عني يبي يأخرني ويتعداني.
مشيت من التفتيش ودعست أبحث عنه بس ما لاقيته.

خلني أقابلك مرة ثانية والله ما يردني إلا السكين في وسط رقبتك يالخسيس.


وقبل دقايق جاي من القصيم وكنت أمشي 120، جاء شاص يمشي 170 أو 180 عند كاميرة ساهر فتحت له وشغلت فلشر ويكبس علي العالي !!!
خير يا طير وش عندك ؟!؟!
وألف شوي على السيد الأيسر أبيه ينزل العالي، وما نزله.

راح وجعل روحه تروح.


بعد ما انتصفت بالطريق دعست أنا، ثم لاقيته قدامي بالأيسر عطيته كبسة صغيرة جداً، ولا كأني موجود.

عطيته ثانية، نفس الشي.

عطيته العالي وسقطت عليه مع الكتف الأصفر، ثم بعد ما تعديته بمسافة 100 متر تقريباً وصار فيه سيارة في الأوسط، تركت البنزين، أبي أحجره.

ويقعد يكبس لي !!!

يابن الناس وين تبيني أروح ما تشوف السيارة يميني ؟!؟!

فعلاً ناس ما تعرف في القيادة أي شي غير عب بنزين وادعس وبس، لا أخلاق ولا قوانين ولاذمة ولا دين ولا أي شيء.

دعست شوي ودقيت اشارة يمين وفتحت له، دخلت بين سيارتين وضغطت فرامل علشانه، أبيه يفهم إن القيادة فن وذوق وأخلاق.

بعد ما سقط علي ببعض الوقت دعست أنا ورحت أسقط عليه ونفس القضية تتكرر، ما يفتح نهائياً، رحت يمين ما فيه ولا سيارة يعني الوضع !!!

طلعت عليه مع الكتف الأيسر وسقطت عليه وأنا أسقط عليه ألف شوي شوي عليه لين خليته يسنتر بالأوسط مثل الأوادم.




أدري إني غلطان كثير بسواقتي وحركاتي، بس شيسوي الواحد إذا لقى راعي سيارة مو راضي يفتح له نهائياً !!! وش أسوي بهالحالة ؟!

أهدي وأقعد أمشي وراه لين أوصل مشواري والا كيف ؟!؟!؟!






الموضوع الثاني عن تجربتي مع الزيوت المكررة السعودية الرخيصة.
اشتريت كرتون فيه 24 علبة كل علبة فيها تقريباً 700 ملل وتطلع العلبة بـ 3 ريال.

غيرت زيت اللومينا وكذلك الونيت الصيني منه.

ملاحظاتي عليه:
- لزوجته ضعيفة جداً ما فيه أي لزوجة.
- يتبخر بسرعة مما يضطرني أزيده بعد كل مشوار، وبعد المشاوير الطويلة يروح منه علبة تقريباً أو أكثر !!!
- صوت البلوف أعلى مما كان سابقاً.


نصائحي:
- لا أحد يستخدمه، خصوصاً للسيارات الجديدة.
- في اللومينا ماشي كويس لا بأس، بس في الونيت 2013 ما ينفع نهائياً.

هو كرتون وخلص من كثر ما أزيد منه ههههه


وتوبة إن شريت مكرر مرة ثانية.

إن شاء الله الزيت القادم 15W40 أصلي.

إبلاغ

الردود